নিয়মীয়া বাৰ্তা
অসমৰ সৰ্বাধিক প্ৰচলিত দৈনিক বাতৰিকাকত

বিজ্ঞান সম্পর্কীয় প্রবন্ধ প্রকাশত বিশ্বৰ তৃতীয় স্থানত ভাৰত

প্রকাশিত প্রবন্ধৰ ৫.৩১ শতাংশই হ’ল ভাৰতৰ...

41

বিজ্ঞান আৰু অভিযান্ত্রিক প্রবন্ধ প্রকাশৰ ক্ষেত্রত বিশ্বৰ ভিতৰতে ভাৰতে তৃতীয় স্থান লাভ কৰিছে৷ আমেৰিকা যুক্তৰাষ্ট্রৰ এক সমীক্ষাত এই তথ্য প্রকাশ পাইছে৷ বৈজ্ঞানিক প্রবন্ধ প্রকাশৰ ক্ষেত্রত বিশ্বৰ ভিতৰত ২০.৬৭ শতাংশৰে প্রথম স্থানত আছে চীন দেশ৷ ১৬.৫৪ শতাংশৰে দ্বিতীয় স্থানত আছে আমেৰিকা৷ আমেৰিকাৰ নেচনেল ছায়েঞ্চ ফাউণ্ডেচন, চমুকৈ এনএছএফে ২০০৮ চনত আৰম্ভ কৰা তথ্যৰ পৰিসংখ্যা মতে ভাৰতে প্রকাশ কৰিছে ৪৮,৯৯৮টা বিজ্ঞান আৰু অভিযান্ত্রিক বিষয়ৰ নিবন্ধ৷ ২০১৮ চনত ভাৰতে প্রকাশ কৰা এনে নিবন্ধৰ সংখ্যা বৃদ্ধি পালে ১,৩৫,৭৮৮টালৈ৷ বিশ্বত প্রকাশ পোৱা বিজ্ঞান আৰু অভিযান্ত্রিক প্রবন্ধৰ ৫.৩১ শতাংশই হ’ল ভাৰতৰ৷ আনহাতে প্রথম স্থানত থকা চীনৰ ক্ষেত্রত পৰিসংখ্যা মতে ২০০৮ চনত ২,৪৯,০৪৯টাৰ পৰা ২০১৮ চনত নিবন্ধৰ সংখ্যা বৃদ্ধি পালে ৫,২৮,২৬৩টালৈ৷ বৃদ্ধিৰ হাৰ ৭.৮১ শতাংশ বার্ষিক৷ এনে নিবন্ধ প্রকাশৰ ক্ষেত্রত দ্বিতীয় স্থানত থকা আমেৰিকাৰ বছৰি বৃদ্ধিৰ হাৰ হ’ল ০.৭১ শতাংশ৷ পৰিসংখ্যা হিচাপত ২০০৮ চনত ৩,৯৩,৯৭৯টাৰ পৰা ২০১৮ চনলৈ বৃদ্ধি পালে ৪,২২,৮০৮টালৈ৷ প্রথম দহটা স্থানত থকা আনকেইখন ৰাজ্য হ’ল ক্রমে জার্মানী (১,০৪,৩৯৬টা), জাপান (৯৮,৭৯৩টা), ব্রিটেইন (৯৭,৬৮১টা), ৰাছিয়া (৮১,৫৭৯টা), ইটালী (৭১,২৪০টা), দক্ষিণ কোৰিয়া (৬৬,৩৭৬টা) আৰু ফ্রান্স (৬৬,৩৫২টা)৷ এনএছএফৰ তথ্য মতে, আমেৰিকা আৰু ইউৰোপিয়ান সংঘৰ পৰা প্রকাশ পোৱা গৱেষণা পত্রিকাসমূহৰ প্রভাৱ সর্বাধিক৷ ইফালে চীনত প্রভাৱশালী প্রকাশন সৃষ্টিৰ ক্ষেত্রত বৃদ্ধিৰ হাৰ দ্রুত৷

You might also like