নিয়মীয়া বাৰ্তা
অসমৰ সৰ্বাধিক প্ৰচলিত দৈনিক বাতৰিকাকত

ক’ৰোনাঃ অৰুণাচলত বন্ধ ইনাৰলাইন পার্মিট

100

নিয়মীয়া বার্তা, ১৯ মার্চঃ ক’ৰোনা ভাইৰাছ সংক্রমিত নহ’বলৈ অৰুণাচল প্রদেশ চৰকাৰে সতর্কতামূলক ব্যৱস্থাৰ অংশস্বৰূপে ইনাৰ লাইন পার্মিট সাময়িকভাৱে বন্ধ কৰিছে ৷ চুবুৰীয়া ৰাজ্য অৰুণাচল প্রদেশ চৰকাৰে বিশেষ সতর্কতামূলক ব্যৱস্থা হাতত লৈ সকলোধৰণৰ ইনাৰ লাইন পার্মিটৰ অনুমোদন বন্ধ কৰি দিছে ৷ অৰুণাচল প্রদেশ চৰকাৰে বহিঃৰাজ্যৰ লোকৰ বাবে আন্তঃৰাজ্যিক পাৰপত্র বন্ধ ৰাখিছে যদিও নবীকৰণ চলি থাকিব ৷ ক’ৰোনা ভাইৰাছৰ আতংকৰ মাজতে দেশৰ বিভিন্ন ৰাজ্যৰ শতাধিক লোক ইনাৰ লাইন পার্মিটৰ বাবে আহি বুধবাৰে বান্দৰদেৱাত আবদ্ধ হৈ পৰে ৷ বুধবাৰে পুৱাৰে পৰা অৰুণাচলৰ প্রদেশৰ ৰাজধানীৰ প্রবেশদ্বাৰ বান্দৰদেৱাত প্রশাসনে সতর্কতামূলক তালাচী কঠোৰ কৰি তুলিছে ৷ চীনৰ দাঁতিকাষৰীয়া ৰাজ্য হিচাপে অৰুণাচল প্রদেশত এতিয়ালৈকে এজনো ক’ৰোনা ভাইৰাছ সংক্রমিত ব্যক্তিৰ তথ্য চৰকাৰৰ হাতত নাই ৷ আনহাতে পাহাৰীয়া ৰাজ্যখনৰ স্বাস্থ্য বিভাগে সজাগতা সভা পাতি ৰাইজক সজাগ কৰাৰ প্রয়াস চলাইছে ৷ ইফালে উত্তৰ–পূব সীমান্ত ৰে’লৱেই গুৱাহাটী–নাহৰলগুন শতাব্দী এক্সপ্রেছৰ চলাচল ৩১ মার্চলৈ বাতিল কৰিছে ৷

You might also like