নিয়মীয়া বাৰ্তা
অসমৰ সৰ্বাধিক প্ৰচলিত দৈনিক বাতৰিকাকত

বেতৰ উদ্যোগেৰে সফলতাৰ বাটত যোৰহাটৰ দেৱাশিস খাউণ্ড

65

হেমেন দাস, ককিলামুখ 

কিবা এটা কৰাৰ মন থাকিলে যে অর্থ অন্তৰায় হ’ব নোৱাৰে সেয়াই কৰি দেখুৱালে যোৰহাটৰে এজন যুৱকে৷ চিৰতীয়া গাঁৱৰ এই যুৱকজনৰ নাম দেৱাশিস খাউণ্ড৷ আজি যুৱকজনে থলুৱা শিল্পকর্মৰে স্বাৱলম্বিতাৰ এক নিদর্শন দাঙি ধৰিছে৷ যুৱকজনে যিটো সময়তব্যৱসায় আৰম্ভণি কৰিছিল তেতিয়া বেতৰ শিল্পৰ নিচেই চালুকীয়া অৱস্থা৷ কিন্তু অসমীয়াৰ নিজৰ হাতত থকা বাঁহ–বেতৰ উদ্যোগটোক নিজৰ পেছাগত ব্যৱসায় হিচাপে বাছনি কৰাৰ বাবে অকনো সংশয়বোধ নকৰিলে যুৱকজনে৷ কিয়নো তেতিয়াৰ সময় আছিল প্রৱল প্রত্যাহ্বান৷ চিকিৎসক পিতৃ উমেশ চন্দ্র খাউণ্ডৰ গাঁৱৰ আপোন ঘৰ মাজুলী৷ কর্মসূত্রে যোৰহাটত স্থায়ীভাৱে বসবাস কৰিবলৈ লয়৷ পিতৃৰ উপার্জনলৈ হাত নেমেলি একমাত্র পুত্র দেৱাশিসৰ মনলৈ আহে নিজে কিবা এটা কৰাৰ ইচ্ছা৷ সেই মানসেৰে পোনপ্রথমেই বাঁহ–বেতৰে খৰাহি, পাচি আদিকে ধৰি নিত্য প্রয়োজনীয় সামগ্রী বনাবলৈ মন মেলে৷ কথা মতেই কাম, শিৱসাগৰৰ পৰা কেঁচামাল আনি যোৰহাটৰ নিজ গৃহতেই আৰম্ভণি কৰিছিল এই শিল্পকর্ম৷ পৰৱর্তী সময়ত এই কর্মৰে পোৱা উপার্জনৰ ৩৫,০০০ টকা মূলধন বিনিয়োগ কৰি ২০১২ চনতে খাউণ্ড বেম্ব’ এণ্ড কেন নামেৰে এই বেতৰ শিল্পৰাজিক ৰাইজৰ মাজলৈ অনাৰ প্রয়াস কৰে৷ কেঁচা সামগ্রীৰ অধিক প্রয়োজন হোৱাত কার্বি আংলং, অৰুণাচল আৰু নাগালেণ্ডকে ধৰি দাঁতিকাষৰীয়া ৰাজ্যৰ পৰাও অনাৰ সু–ব্যৱস্থা কৰে৷ ‘আসাম কেন ফার্নিচাৰ’ নতুন নামকৰণ তথা গুণগত মানৰে উজলি উঠে ২০১৭বর্ষত৷ উত্তৰ–পূব বাণিজ্য মেলাকে ধৰি প্রদর্শনী মেলাসমূহত ৰাইজৰ দ্বাৰা উচ্চ প্রশংসিত হয় এই আসাম কেন ফার্নিচাৰ বেতৰ সামগ্রীসমূহ৷ব্যৱসায়ৰ এক নতুন মাত্রা প্রদানৰেবর্তমান অইল, আসাম প্রাকৃতিক গেছ আয়োগ, ডিব্রুগড বিশ্ববিদ্যালয়কে ধৰি যোৰহাটৰ কৃষি বিশ্ববিদ্যালয়লৈ এই বেতৰ সামগ্রীসমূহ যোগান ধৰে দেৱাশিসে৷ বর্তমান আমগুৰিতো একে নামৰে আৰু এখন ফার্নিচাৰ আছে দেৱাশিসৰ৷ ২০ লাখ টকাৰ বেতৰ সামগ্রীসমূহৰ ‘আসাম কেন ফার্নিচাৰ’ আজিৰ তাৰিখত দেৱাশিসৰ এক প্রসাৰ বাণিজ্য৷ অসমৰ এই আন্দোলনৰ ভৰপক সময়তো কর্মবিপ্লবৰ সূচনা কৰিবলৈ সাজু আছে দেৱাশিস৷ মিচিং, দেউৰী ল’ৰাকে প্রাধান্য দি ১৫জনকৈ অসমীয়া খাটিখোৱা নিবনুৱা ল’ৰাক এই বেতৰ উদ্যোগত সংস্থাপন দি তেওঁলোকৰ পৰিয়ালৰ মুখত হাঁহি বিৰিঙাবলৈও সক্ষম হৈছে যোৰহাটৰ দেৱাশিস খাউণ্ড৷

You might also like