নিয়মীয়া বাৰ্তা
অসমৰ সৰ্বাধিক প্ৰচলিত দৈনিক বাতৰিকাকত

ককয়াৰ বস্ত্ৰ উদ্যোগে মোকলাইছে স্বাৱলম্বিতাৰ পথ

দ্বিতীয় শুৱালকুছি

65

অৰূপ ৰঞ্জন বৰ্মন, নলবাৰী

বিংশ শতিকাৰ শেষৰ পিনে বস্ত্র উৎপাদনৰ ক্ষেত্রত এটা নৱজাগৰণৰ সৃষ্টি হৈছিল৷ এই বস্ত্র শিল্পই আমাৰ আর্থ–সামাজিক ক্ষেত্রখনত এক প্রভুত বৰঙণি দিবলৈ সক্ষম হৈছে৷ গৌৰৱোজ্জ্বল ছশ বছৰীয়া আহোম ৰাজত্বকালত স্বর্গদেউ ৰুদ্রসিংহৰ কার্যকালত (১৬৯৬–১৭১৪) ৰেচম শিল্পই যথেষ্ট উন্নতি সাধন কৰাৰ কথা উল্লেখ আছে৷ সেয়ে অসমৰ বস্ত্র শিল্পৰ ইতিহাস বহু পুৰণি৷ অসমীয়া শিপিনীয়ে বোৱা ‘ছাঁতে শুকোৱা মুঠিতে লুকোৱা’ বস্ত্র ইতিমধ্যে সমগ্র এছিয়াৰ বজাৰ দখল কৰিছে৷ শুৱালকুছিৰ পিছতে নলবাৰী জিলাৰ ককয়া গাঁওখনে বস্ত্র উৎপাদনৰ ক্ষেত্রত নৱজাগৰণৰ সৃষ্টি কৰি এক সুকীয়া পৰিচয় পাবলৈ সক্ষম হৈছে৷ শুৱালকুছিৰ বাট বুলোৱা ককয়া এতিয়া ‘দ্বিতীয় শুৱালকুচি’ত পৰিণত হোৱা বুলি কোৱা হয়৷
আশীৰ দশকত ককয়াত আৰম্ভ হৈছিল বস্ত্র উৎপাদন৷ গাঁওখনৰ বস্ত্র উৎপাদনৰ প্রবাদ পুৰুষ হৰমোহন নাথে ১৯৮২ চনতেই বস্ত্র উৎপাদনৰ বাবেই নিজৰ ঘৰতেই বস্ত্র উৎপাদন কৰিছিল৷ গাঁওখনত বস্ত্র শিল্পৰ বীজ ৰোপণ কৰা হৰমোহন নাথে অৱশ্যে শুৱালকুছিৰ হালোগাঁৱৰ পৰা আহি স্থায়ীভাৱে বসবাস কৰে৷ তেওঁ গামোচাৰ বস্ত্র উৎপাদন মুকলি কৰাৰ সময়ত আজিৰ দৰে ককয়াত নাছিল হস্তচালিত যন্ত্র ‘ড্রাম’৷ বাটি কাড়িবৰ বাবে নিব লগা হৈছিল শুৱালকুছি আৰু হালোগাঁৱলৈ৷ ইয়াৰ পৰৱর্তী সময়ত এই উদ্যোটোক আন এক মাত্রা প্রদান কৰে ককয়াৰ নিচেই গাতেই লাগি থকা বর্ণিবাৰী গাঁৱৰ নাথ চুপাৰ মদন চন্দ্র নাথে৷ বিগত অসম আন্দোলনৰ সময়ত ১৯৮৩ চনৰ ৮ ফেব্রুৱাৰীত বেলশৰ থানাৰ সন্মুখত আৰক্ষীয়ে আন্দোলনকাৰীৰ ওপৰত চলোৱা নির্বিচাৰ গুলীচালনাত গুলীবিদ্ধ হৈ ঘূণীয়া হ’ব লগা হয় মদন চন্দ্র নাথ৷ নাথে ১৯৮৮ চনত ককয়াৰ বস্ত্র উদ্যোগৰ বৰভেটি নির্মাণত নামি পৰে আৰু প্রথমবাৰৰ বাবে পাট–মুগাৰ বস্ত্র উদ্যোগ প্রতিষ্ঠা কৰে৷ বস্ত্র উদ্যোগ সন্দর্ভত অনভিজ্ঞ নাথে শুৱালকুছিত প্রশিক্ষণপ্রাপ্ত স্থানীয় শিপিনীৰ পৰামর্শ মতে চাৰিখন পাটৰ মেখেলা–চাদৰ বোৱা শাল আৰু এটা হস্তচালিত বস্ত্র (ড্রাম) নির্মাণ কৰালে৷ ইয়াৰ পিছতে হৰগোবিন্দ নাথ আৰু অনিল নাথে পাট–মুগাৰ শাল নির্মাণ কৰাই বস্ত্র উদ্যোগ প্রতিষ্ঠা কৰিলে৷ এনে উদ্যোগৰ প্রতি আকর্ষিত হৈ ইজনৰ পিছত সিজনকৈ শিক্ষিত নিবনুৱা যুৱকে ঘৰে ঘৰে বস্ত্র উদ্যোগ খুলি স্বাৱলম্বী হোৱাৰ পথ প্রশস্ত কৰি তোলে৷
গাঁওখনৰ প্রায় প্রতিটো পৰিয়ালত মাকোৰ খটখট শব্দ৷ শিক্ষিত নিবনুৱা যুৱক তথা ‘জয়মতী চিল্ক হাউছ’ৰ স্বত্বাধিকাৰী প্রদীপ নাথে জানিবলৈ দিয়া মতে, গাঁওখনত সম্প্রতি ২০০–২৫০খন শাল আছে৷ ইয়াৰ ভিতৰত পাটৰ ৪০খন, মুগাৰ ৬খন আৰু ১৫০–২০০খন গামোচাৰ শাল আছে৷ ইয়াৰ লগতে নাথৰ ‘জয়মতী চিল্ক হাউছ’আৰু কমলেশ্বৰ বর্মনৰ ‘আৰতী চিল্ক হাউছ’ নামৰ প্রতিষ্ঠান দুখনে কেঁচা সামগ্রী আৰু উৎপাদিত বস্ত্র বিক্রী কৰি আহিছে৷ পূর্বতে এনে প্রতিষ্ঠান পাঁচখন আছিল৷ ইয়াৰে প্রণৱ হালৈৰ মল্লিকা ছিল্ক চেণ্টাৰ, ভবেন নাথ ‘মাতৃ ছিল্ক হাউছ’ আৰু পংকজ নাথৰ ‘লাৱণ্য ৰেচম উদ্যোগ’ নামৰ প্রতিষ্ঠানকেইখন ইতিমধ্যে বিভিন্ন কাৰণত বন্ধ হৈ পৰিল৷ গাঁওখনৰ পংকজ নাথ আৰু তেওঁৰ ভাতৃ মজুম নাথে পাট–মুগা আৰু গামোচাৰ বিভিন্ন ডিজাইন বনাই সমাদৰ লাভ কৰিছে৷ আনহাতে, যোৱা কেইটামান বছৰৰ পৰা এই দুই ভাতৃয়ে কম্পিউটাৰ আৰু স্কেনাৰ মেচিন ব্যৱহাৰ কৰি বিভিন্ন ডিজাইন প্রস্তুত কৰি আছে৷ যাৰ ফলত ককয়াৰ পাট–মুগাৰ কাপোৰ আৰু গামোচাই শুৱালকুছিৰ বস্ত্রৰ লগত ফেৰ মাৰিবলৈ সক্ষম হৈছে৷ আনহাতে, ককয়া গাঁৱত আছে সম্প্রতি তিনিগৰাকী ফেৰিৱালা৷ ফেৰিৱালাই গাঁৱৰ উৎপাদিত বস্ত্র বিভিন্ন প্রান্তলৈ বিক্রীৰ বাবে কঢ়িয়াই নিয়ে৷ গাঁওখনত সর্বাধিক পাঁচখনকৈ শাল থকা শিক্ষিত নিবনুৱা যুৱক জিতুমণি ডেকাও এগৰাকী ফেৰিৱালা৷ এনেদৰে গাঁওখনৰ বিভিন্ন শ্রেণীৰ লোকে দেখুৱাইছে স্বাৱলিম্বতাৰ পথ।

You might also like