নিয়মীয়া বাৰ্তা
অসমৰ সৰ্বাধিক প্ৰচলিত দৈনিক বাতৰিকাকত

ক’ৰোনা ভাইৰাছঃ এমাহতকৈ কম সময়ত নিৰ্মাণ কৰিব বিশেষ হাস্পতাল

91

নিয়মীয়া বাৰ্তা, ২৯ জানুৱাৰীঃ চীনত ভয়ংকৰ ৰূপ ধাৰণ কৰা ক’ৰোনা ভাইৰাছক লৈ এতিয়া তৎপৰ হৈ পৰিছে চীন চৰকাৰ । দিন-ৰাতি একাকাৰ কৰি এতিয়া নিৰ্মাণ কৰি থকা হৈছে এখন বিশেষ হাস্পতাল । এই মাৰাত্মক ভাইৰাছৰ বাবে বিশেষভাৱে নিৰ্মাণ কৰা এই হাস্পতালখন হ’ব এহাজাৰ বিচনাযুক্ত । ছয় একৰ ভূমিত দিন-ৰাতি একাকাৰ কৰি বিগত এটা সপ্তাহে নিৰ্মাণ কৰি থকা হাস্পতালখন ১৩ ফেব্ৰুৱাৰীৰ পৰা মুকলি কৰা হ’ব বুলিও উল্লেখ কৰা হৈছে ।

ক’ৰোনা ভাইৰাছৰ বাবে কেৱল এখন হাস্পতাল নিৰ্মাণ কৰিয়েই ক্ষান্ত হোৱা নাই চীন চৰকাৰ । হোবে আৰু হেনান প্ৰান্তত তিনিখন অস্থায়ী হাস্পতালো নিৰ্মাণ কৰি আছে চৰকাৰে । ইফালে, উহান প্ৰদেশত ১৫০০ বিচনাযুক্ত এখন দ্বিতীয় হাস্পতাল নিৰ্মাণ কৰি থকা হৈছে । এই হাস্পতালখনত চিকিৎসক আৰু কৰ্মীসহ প্ৰায় ২ হাজাৰ লোকক নিয়োগ কৰা হ’ব ।

উল্লেখ্য যে, এই দুয়োখন হাস্পতালৰ নাম বিশেষ দেৱীৰ নামত ৰাখিছে চীন চৰকাৰে । প্ৰথমখন হাস্পতালৰ নাম অগ্নি দেৱী অৰ্থাৎ হোয়োচেনছ্যান (চীনা ভাষা) আৰু দ্বিতীয়খন হাস্পতাল লেইচানচান (চীনা ভাষা) অৰ্থাৎ বজ্ৰৰ দেৱী ।

You might also like