নিয়মীয়া বাৰ্তা
অসমৰ সৰ্বাধিক প্ৰচলিত দৈনিক বাতৰিকাকত

লকডাউন নামানে এইসকল তথাকথিত সচেতনেঃ বহিল সাপ্তাহিক বজাৰ

175

নিয়মীয়া বাৰ্তা, ২৬ মাৰ্চঃ ক’ৰোনা ভাইৰাছৰ সংক্ৰমণ ৰোধ কৰাৰ বাবে দেশৰ প্ৰধানমন্ত্ৰী নৰেন্দ্ৰ মোডীয়ে ২১ দিনৰ বাবে দেশত লকডাউন ঘোষণা কৰে যদিও তাৰ বিপৰীত ছবি দেখা গৈছে অসমত । অসমৰ ভিন্ন প্ৰান্তৰ পৰা অহা খবৰ অনুসৰি প্ৰায় কেইখন জিলাতেই এতিয়া সাধাৰণ ৰাইজে ভংগ কৰিছে লকডাউন ।

গুৱাহাটীৰ ফাঁচীবজাৰতে এতিয়া দেখা গৈছে এখন বজাৰত ব্যাপক ভিৰ । সামাজিক দূৰত্ব অথবা কোনো প্ৰতিৰোধ অবিহনেই প্ৰশাসনৰ সমুখতে এইদৰে অব্যাহত আছে সমাগম ।

একেই দৃশ্য দেখা গ’ল নগাঁৱৰ আদৰ্শ বজাৰত । সুলভ মূল্যৰ শাক-পাচলি আৰু লাগতিয়াল বস্তু ক্ৰয়ৰ বাবে পুৱাই বজাৰত উপস্থিত হ’ল শশ লোক । আৰক্ষীৰ চকুৰ সমুখতে একাংশ লোকে নিৰ্বিচাৰে সামাজিক দূৰত্বৰ লগতে লকডাউন উলংঘা কৰাৰ এই পৰিমাণ অনাগত সময়ত ভয়াৱহ হোৱাটো নিশ্চিত । ইফালে, নগাঁৱৰে ৰূপহীহাটৰ জিউমাৰী বৃহস্পতিবাৰে বহিল সাপ্তাহিক বজাৰ । প্ৰশাসনৰ নীতি-নিৰ্দেশনা উলংঘা কৰি সাপ্তাহিক বজাৰ বহোৱা এইসকলৰ বিৰুদ্ধে কিবা ব্যৱস্থা গ্ৰহণ কৰিবনে ?

অভিজাত এইসকল অবুজন লোকক এতিয়া বুজাব কোনে । বিশ্বজুৰি ক’ৰোনাই কালৰূপ ধাৰণ কৰাৰ দৃশ্য প্ৰত্যক্ষ কৰি অহাৰ পাচতো তিলমানো অনুতপ্ত নহয় এইসকল লোক । বৃহস্পতিবাৰে পুৱাই যোৰহাট আৰু তিনিচুকীয়া চহৰতো দেখা গ’ল ব্যাপক ভিৰ । ট্ৰাক, গাড়ী , ঠেলা সকলো লৈ ওলাই আহিল সাধাৰণ লোক । সকলোতে দেখা গ’ল এক মেলা সদৃশ পৰিৱেশ ।

নিজৰ জীৱন আৰু সুৰক্ষাৰ প্ৰতি সচেতন নোহোৱা এইসকল লোকৰ ক্ষেত্ৰত প্ৰশাসনৰ কঠোৰ নীতি প্ৰযোজ্য হ’লেহে যেন নিয়ন্ত্ৰণলৈ আহিব পৰিস্থিতি । দেশজুৰি ক্ৰমাগত ভাৱে বৃদ্ধি পাই থকা ক’ৰোনা আক্ৰান্তৰ সংখ্যা আৰু ১২ জনলৈ বৃদ্ধি পোৱা মৃতকৰ সংখ্যাইও যেন লকডাউন কৰি ৰাখিব পৰা নাই এইসকল তথাকথিত অভিজাত লোকক ।

You might also like